top of page

Amaro Gerard; Boneiru un produkto tòp turístiko, ku no ta desaroyá su mes hendenan

Kralendijk 5 di febrüari 2023 - Industria turístiko na Boneiru den e último añanan aki a desaroyá un produkto atraktivo den e mundu di turismo mundialmente. Bonaire ta un paraiso pa buseo, Boneiru ta un isla ku ta mas leu den desaroyo i protekshon di su naturalesa dor di protokòlnan ku a wòrdu krea pa esaki, un isla inovativo pa e área di Caribe. Pero ménos inovativo ku desaroyo di e mas ku 2500 persona nan ku dirèkt òf indirekto ta traha den e sektor turístiko.


Tin masha hopi plan pa futuro di e isla di Boneiru pero sin plan pa desaroyo di e personanan ku tin ku duna e servisio den e sektor di turismo. Un empresa den e sektor di turismo mester tin plan di desaroyo pa su trahadónan, pa halsa kalidat i servisio di e kompania i di e área ku nan ta funshoná aden. Na Boneiru 70% di e doñonan di hotèl òf akomodashon pa turista ta bini for di Hulanda, i niun di e kompanianan aki tin un plan di desaroyo pa nan trahadónan, si mester di trahadó ta solisitá awe i mañan bo ta riba flur.


Fuera di esei ta hasi uso di stagiare nan ku hopi biaha no tin eksperensia, òf personal pasahero ku ta traha 3 pa 5 luna na e kompanianan aki i ku no tin ningun loyalidat ku e empresa i pió ainda ku e isla, loke ta pone ku bo kalidat i servisio di bo produkto ta baha di nivel. Esaki ta kita e chèns ku un hende lokal por traha i tambe desaroyá su mes riba e área aki.


Boneiru ku ta un produkto asina prestigioso mester bai eksigí tambe mas di invershonistanan den turismo, ku p’abo konstruí un hotèl aki na Boneiru bo mester kumpli ku sierto eksigensianan, pa promé hotèlnan di kalidat, no 4 blòki ku un tènt den un área turístiko. Mester eksigí kambernan di kalidat ku ta kumpli ku e produkto ku nos ta brindando. Mester tin un plan di desaroyo pa e personal na e kompania, mester tin un plan salarial, mester tin un areglo di penshun. Tur invershonista den turismo ku ta aportá na ekonomia mester tin òf ta traha huntu na un plan di desaroyo den e komunidat Boneriano.


Mester bin enseñansa di nivel haltu pa e sektor turístiko, esaki mester wòrdu desaroyá ku e sektor, manera un skol di hoteleria internashonal ku aporte di e sektor i gobièrnu, traha ku partner nan internashonal ku eksperensia den enseñansa hotelero i turismo. Desaroyá e Boneriano dor di hisa su nivel i asina trese kompanianan i kadenanan internashonal di 5 strea den e área turístiko, Boneiru ta internashonalmente den tòp di turismo pero nos no tin kompanianan tòp di 5 strea akinan, nos tin hotèlnan di 3 strea. Empresanan ku plan di desaroyo i ku tin tambe membership plans ku outomátikamente ta trese nan miembronan Boneiru.


Ora mi yega Boneiru mi kier mira un Boneriano alegre, desaroyá, ku na un nivel haltu ta duna servisio, den un ambiente turístiko di nivel haltu. Desaroyo di nos hendenan, tur hende ku ta biba i aportá na Boneiru ta importante, un hende desaroyá ta trese, trankilidat sosial i stabilidat ekonómiko.

Asina tin mas sektor aki na Boneiru ku ta ganando hopi sèn i ku no ta aportá na e komunidat Boneriano, ku no ta dunando nada bek ni den deporte, kultura òf eventonan sosial, esaki ta eksigí un kambio drástiko.

1 view0 comments

コメント


bottom of page