Mas di Daisy

Profeshon

Daisy ta un profeshonal riba tereno di logopedia, esta tur área ku tin di haber ku komunikashon verbal i noverbal. E ta trata personanan for di resien nasí te ku 100+ aña ku tin problema ku idioma, oido, artikulashon i uso di bos. Hendenan ku tin pro­ble­ma ku komementu, bebementu i gulimentu, uso di pulmon pa hala rosea i hendenan ku malesa manera entre otro Parkinson, Alzheimer, kanser di garganta, Dysfagia, CVA i Afasia tambe ta haña tratamentu serka Daisy. Su kompania ta establesé na Bonaire, pero e tin hopi kliente tambe na St. Eustatius, Saba i St. Maar­ten. Su servisionan ta hopi pidí komo ku e ta un di e poko logopedistanan multilin­gual. El a hasi su estudio tantu na ingles komo hulandes (risibiendo dos diploma) i e ta dominá 5 idioma: papiamentu, spañó, ingles i hulandes perfektamente i franses ba­sta bon.

​

Banda di su trabou komo logopedista Daisy tabatin tambe pa 20 aña, te ku fin di yüni 2018, un lokalidat kaminda tabatin kuido despues di skol pa muchanan di skol primario i hóbennan di skol sekundario. Aki e mucha- i hóbennan tabata bini despues di skol pa sigui e programa rekreativo i edukativo ku Daisy tabata brinda nan tur dia. Nan tabata risibí guia profeshonal pa loke ta trata nan tareanan di skol i tambe nan kom­por­tashon. Daisy a organisá hopi aktividat edukativo-rekreativo tantu durante di aña eskolar komo den fakansinan di skol. E aktividat ku semper a hala hopi atenshon i ku tur aña tabata e aktividat preferí di tur mucha, hóben i mayor, ta e simannan di kam­pamentu den fakansi grandi. Mayornan tabata baha nan yu(nan) serka Daisy i su tim i bira bai ku hopi konfiansa sabiendo ku e muchanan durante 2 pa 3 siman lo gosa di un tremendo plan di fakansi, kompletamente bou di responsabilidat di Daisy. Daisy su amor pa mucha i hóben ta grandi! Komo ku e tin bon kontakto ku e muchanan, hóbennan i nan mayornan i ku vários skol, Daisy tin un bon bista di e desaroyonan den enseñansa aki na Boneiru. Daisy ta e aktual presidente di Konseho di Iglesia Protestant na Boneiru i tambe e ta presidente di Flamingo Toastmasters Club di Boneiru.

​

Karera polítiko

Daisy no ta un persona ku tabatin aspirashon pa drenta polítika. Tabata e partido polítiko Movementu di Pueblo Boneriano (MPB) ku a aserká Daisy pa fungi komo moderadó den entrevista ku e kandidatonan di e partido. Sinembargo, segun e dianan tabata pasa i yudando e partido, Daisy tiki tiki a bin ta sinti mas afinidat ku e idea­nan, plannan i e vishon di e partido. Ora e lider di partido, Sr. Elvis Tjin-Asjoe a aser­ká Daisy ku e petishon pa ofisialmente afiliá i subi lista, e kontesta tabata fásil. Des­pues di elekshon di mart 2015, Daisy a sirbi pueblo di Boneiru den Konseho Insular, pro­mé komo miembro i despues komo lider di frakshon di MPB. Den e funshon aki Daisy a bishitá Hulanda na vários okashon kaminda el a hiba palabra ku parlamen­tario­nan di Eerste i Tweede Kamer i vários otro polítiko di taye haltu. Na ougùstùs 2016 ‘Nederlandse Vereniging van Raadsleden’ (ántes ‘Raadslid.Nu’) na Hulanda a nom­bra Daisy komo ‘Raadslid van de maand’. Daisy tabatin tambe e honor di representá koalishon di Boneiru na 2017 i hiba e mensahe di e pueblo di Boneiru den e reu­nion di Hulanda ku nos islanan ruman Aruba, Kòrsou i St. Maarten. Tabata pa promé i último bes ku Boneiru a partisipá parsialmente na e Konsulta Interparlamen­tario di Reino (Interparlementair Koninkrijksoverleg - IPKO) aki. Despues di su parti­si­pa­shon na IPKO, Daisy a keda ku bon kontakto ku vários miembro di Parlamento di Hulanda, Aruba, Kòrsou, St. Maarten i tambe Saba i St. Eustatius. Daisy ta haña hopi reakshon positivo pa su trabou desplegá den su funshon di miem­bro di Konseho Insular en general i en partikular komo miembro di frakshon di MPB.

​

​