5. ALBERSEETO CECILIA

Ami ta Alberseeto Cecilia nase na Kòrsou i mi tin 26 aña di edat. Di mi 26 aña di edat mi a biba 25 aña I mei na Boneiru I mei aña na Hulanda. Na Boneiru mi a biba algun aña den e bario Rincon i e sobra añanan den e bario di Nikiboko. Mi tata ta di e bario Rincon i mi mama ta di Guyana. Esaki ta pone ku mi tin un bon bista pa loke ta trata diferente kultura I manera di pensa. Mi mes ta tata di dos tremendo yu hòmber.

Mi a traha 6 aña na Koninklijke Marechaussee na Boneiru. E lastu dos añanan mi ta trahando den e parti di seguridat na RCN. Mi ta un persona alegre i positive ku para tras di loke mi ta kere den dje. Mi ta haña ku honestidat I transparensia ta dos kos esensial pa tin konfiansa I pa por tin bon maneho.

Mas di Alberseeto

Dikon ami Alberseeto a skohe pa drenta polítika?
Den seno di amigu un dia mi a haña e siguiente pregunta: si mi lo haña tur kos ku mi mester I mi por a skohe unda ku ta na mundu pa mi biba, unda lo mi a skohe pa biba?
Mi kontesta: Sin ku mi tin nada mes, lo mi skohe Boneiru sin pensa dos biaha.

Mi amor pa nos dushi isla di Boneiru ta ineksplikabel. Mi a sinta pensa kon mi lo por duna un aporte pa sigui mantené nos bunita isla dushi I bunita. Ta na e momento aki mi a disidí ku drenta polítika lo ta kisas un di e mihó maneranan pa duna mi aporte. Hopi biaha mi tin mi mes ideanan I opinionnan di tópikonan ku tin haber ku Boneiru, pero sinta na banda I reklamá so lo mi no yuda ku nada. Esaki te motibu dikon mi a disidí di drenta polítika.

M21 a yega na mi atenshon despues ku mi a lesa un mensahe publiká riba Facebook di M21. Na momentu ku mi a bai hasi mi investigashon pa mira kiko e Partido ta para p'e, mi disidí di hala un kòmbersashon ku e lider polítiko di M21 kual ta Daisy Coffie. Despues di e kòmbersashon aki mi a bin realisá ku e vishon di ami persona i tambe di M21 ta kuadra ku otro. Kaminda nos lo pone e hende komo sentro di tur kos.

Mi interesnan polítiko ta deporte, kultura, siguridat I hustisia. Deporte I kultura ta kaminda nos hendenan ta demostrá nan kreatividat I tambe nan talentonan. Esaki ta loke ta duna nos bunita isla mas kolo I identidat. Ta pesei ta importante pa duna esaki nan atenshon. Siguridat I hustisia ta loke nos kada un ke pa nos por sinti nos seif i konfortabel kaminda nos ta biba. Pesei pa ami esakinan tambe ta di sumamente importansia.

Pa kulminá mi ke bisa ku esaki lo bira e diferensia. Un bista nobo I moderno pa yuda nos dushi isla desaroyá I ta e dushi isla ku mi a lanta i kustumbrá kun'e.

BONEIRU TA MI KURASON!!