11. ANTHONY WEBER

Ami ta Tony Weber, mi tin awor aki 1 aña bibando riba e dushi isla Boneiru. Mi a nanse na St.Maarten i mi a biba hopi aña na Kòrsou. Despues di a kaba mi VWO na Kòrsou, mi a bai biba i studia na Hulanda. Mi a kaba e opleiding di Master of Public Administration na Erasmus Universiteit na Rotterdam.

Awor aki mi ta trahando komo beleidsadviseur na OLB. Prome kos ku mi a hasi aki na Boneiru ta introdusí loke yama e Seniorenregeling. Ku esei, a krea e posibilidat, pa tur ambtenar ku a traha hopi aña pa Boneiru, haña e posibilidat pa stòp di traha mas trempan, dus no mester warda te ku 66 pa gosa di bida. Te ku awe mas ku 120 persona a hasi uso di e areglo aki, pa kual mi ta hopi kontentu.

Mas di Anthony

Esaki ta kuadra ku mi filosofia personal ku aki na Boneiru mester pone mas atenshon na e oportunidadnan i posibilidadnan sosio-ekonomiko pa nos hendenan lokal. Boneiru ta kresiendo i floresiendo, pero dia pa dia mi ta mirando ku no ta nos hende lokalnan ta esnan ku ta gosando di e kresementu aki. Inflashon ta poniendo ku preisnan ta birando inpagabel, i kosta di bida ta subiendo drastiko.

Mester bini ku instansia ku ta kontrolá preis i kalidat di produktonan den supermerkado. Mester bini ku un instansia ku ta kontrola preis di tereno i kas di hür (woon-en huurcommissie), pa sòru ku nos hende lokal por tin tereno pa kumpra i/of kas di hür na un preis rasonabel. I mester invertí den mas posibilidad pa krea kupo di trabou den e areanan ku nos isla por lusi den dje, manera agrikultura, pero tambe den areanan di futuro manera data i tèknologia.

Vota pa ami, Tony Weber di Partido M21, pa huntu nos has 'E Diferensia', i sòru pa Boneiru keda un isla dushi ku nos tur por gosa di dje!