2. Bernard Landwier
Un mucha hòmber nasé na Boneiru den aña nan 70, humilde ku un kurason ku ta bati pa su pueblo a lanta den un famia ku tabata eksigí hopi rèspèt i kaminda mi a eksperensia mi tata den su lucha huntu ku demas kompañero(a)nan pa hustisia sosial, spesialmente pa e klase trahadó.
Mi mes a djòin sindikalismo pa eksperensiá kuantu inhustisia tin riba nos isla en general i e klase trahadó en partikular. Pobresa ta un di e krímennan mas grandi kontra e ser humano i nos tur sa ku esaki ta un echo riba nos isla. Polítika antikuá kaminda polítikonan no ta presentá un vishon pa un desaroyo sano di nos komunidat, pero kada kuater aña ta bin ku un kantidat di promesa, pero tambe ta tene nos pueblo dependiente di nan, i ku echonan aki a pone mi haña mas interes pa sigui polítika di aserka.
Mas di Bernard
Boneiru ta kresiendo, pero e ta kresiendo deskontrolá ku tur e molèster ku esaki ta trese kuné. Mi a yega na e konklushon ku komo hóben, mi no por para na banda i mira kon nos Boneiru, manera nos a lanta konosé, esta ku un naturalesa úniko, ku un kultura fuerte, ku hendenan amabel i kariñoso poko ta disparsé i pió ainda ku mas i mas nos komo boneriano ta birando estranhero riba nos propio suela.
Mi a bisa ku mester para e proseso ei i paré awor i despues di hasi un análisis i papia ku diferente hendenan den nos komunidat, mi a keda konvensí ku M21 ta esun ku lo por bai hasi e diferensia den e tempunan benidero. Daisy Coffie a profilá den e temporada tras di lomba den Konseho Insular den un forma hopi na nivel, pero aun mas importante al kaso. Mi ta bai duna un man den e próskimo elekshon pa mi yuda hasi e diferensia den polítika i ser un ehèmpel pa e generashon hóben pa asumí un posishon krítiko, pero krítiko konstruktivo.
Ta nos ta e futuro di mañan i ta nos mester konstruí riba e fundeshi aktual un mihó futuro pa nos tur mañan, kaminda nos no ta laga ningun hende keda atras. Un Boneiru hustu, un Boneiru balansa den kual tur hende ta garantisá di un trabou ku un entrada pa por hiba un bida desente i digno. Un Boneiru ordená ku un bon struktura pa un desaroyo ekonómiko duradero i sostenibel i mas ku tur kos un Boneiru fuerte ankrá riba un kultura fuerte ku ta hasi nos orguyoso di ta Boneriano di un karakter tur parti di mundu gabá.