6. ANGELO ENGELHART

Mi nòmber ta Angelo Engelhart i mi a nase na Bonaire. Mi ta biba den e bario di Nikiboko. Mi ta un persona ku hopi meta i ideanan pa logra kos nan grandi. Mi a studia aki na Bonaire I tambe na Korsou na e universidat rekonosi ku ta UNA. Mi lo ke aportá awor na Bonaire pa hasi esaki un mihó isla ku tur hende por biba trankil riba dje.

Hopi kos a mehorá aki na Bonaire despues di 10-10-10, pero no manera nos a spera. Pesei ami a tuma e reto pa por kontrubí pa trese mehorashon den esaki i sigi un partido ku algu diferente i otro ideanan. Mi a djòin M21 dor di un programa ku no ta traha solamente pa present, pero pa den futuro tambe. Mi a haña intersante tambe ku M21 ta wak ku e hende mester para sentral.

Mas di Angelo

Mi ta un persona ku ta kabes di kas i un tata pami yunan. Nos mester sòru pa dunan nos yunan e balor ku ta importante i sòru pa nan por haña e i miho futuro posibel. Komo tata mi ta pensa ku ta importante pa duna e mihó ehèmpel, manera di respetá bo kasá i tambe otro hende rondó dibo.

Esnan ku konosé mi sa tambe ku deporte ta hunga un ròl hopi importente den mi bida. Mi ta kere fuertemente ku ta importante pa tene kurpa salú. Ta importante pa tur hende, ámbos mucha komo adulto i nos hendenan di edat avansá pa purba move i hasi deporte. Mi ta kere ku na Boneiru lo por hasi hopi ainda pa promové un estilo di bida mas saludabel. Tambe mester di mas fasilidat pa esaki.

Tambe mi ta kere firmemente ku ta hopi importante den bida pa no sinta ketu, pero pa desaroyá nos mes. Tin biaha ta papia riba chènsnan pa nos hóbennan, pero nos mes tambe por hasi hopi pa perkurá ku nos ta eksitoso den nos trabou.

Pesei mi ta pensa ku estudio mester ta algu muchu mas desponibel na un i tur i den diferente área. Ami mes a hasi un estudio den área di accountancy. I awor aki laborando den mundo di penshun. Mi ta konentu ku mi ta traha na organisashon kaminda tin oportunidat amplio pa sigui desaroyá i sigui kasi kalke kurso òf estudio ku nos komo empleado ke. Mi ta di opinion ku nos mester promové esaki mas tantu riba nos isla. Ámbos den konsientisashon di doñonan di trabou, pero tambe empleado kon importante esaki ta. Sinembargo, mester tin mas posibilidat pa yega na fondonan pa un i tur pa por sigui studia, sigui kurso i bai dilanti. Esaki no tur ora ainda te a kaso, i hopi hende no sa e kaminda kon pa yega na esaki.

Banda di esei, komo yu di mayornan ku ta birando grandi mi ta kere firmemente ku mester tin mas atenshon pa nos grandinan. Mester tin mas aktividat pa hende grandi, mester tin mas manera pa tene nan involví den nos komunidat i mester promové pa na kompartí nan balornan, pero tambe nan konosimentu, ku nos ku ta mas yòn. Un área di preokupashon ta falta di bibienda pa hendenan grandi, ku no por biba na só mas. Kaminda ku nan Hulanda tin hopi fasilidat manera kasnan pa asiano, e asina yamá ‘aanleunwoning’, te na e parti kaminda hende por bin na remarke pa biba bou di guia (begeleid wonen). Tur esakinan kasi nos no konosé mes na Boneiru. Banda di kas di kuido, lo mester bin muchu mas fasilidat i akomodashon pa nos hendenan grandi.

Mi ta mira mi mes komo un persona ku por bini ku ideanan nobo ku por aportá na un Bonaire ku tur hende por biba trankil sin prekupashon. Pero loke ta mas importante ainda ta ku mi tin e boluntat di traha i duna di mi banda -ounke sea no-pagá- pa yega na un mihó komunidat pa un i tur i un mihó Boneiru.