top of page

Bernard Landwier Kandidato riba lista di M21; ALGUN PUNTO DI ATENSHON PA E HENDE

Updated: Apr 4, 2023


Kralendijk 30 yanüari 2023 - Un di e preokupashonnan ku a bati nos isla den e último 13 añanan ta e nivel di bida di un grupo supstansialmente grandi. Rapòrtnan basá riba investigashonnan imparsial a konkluí ku 40% di nos poblashon ta biba den pobresa i ku den esaki tin tambe hende ku ta traha, pero ku nan entrada no ta alkansá pa nan kubri nan obligashonnan finansiero mensualmente.

Faktornan ku ta kousa e pobresa aki banda di e entrada abou ta:

1. Kosto di koriente i awa haltu

2. Un falta di transporte públiko pagabel

3. Kosto di kombustibel haltu

4. Preis di hürnan di kas, tantu sosial komo privá haltu.

5. Preisnan di kuminda ku ta oumentá en grande sin ningun klase di kòntròl


Ku sosten i konfiansa di e pueblo votadó, mi kier bai dediká mi tempu den Konseho Insular na e 5 puntonan aki ku e lucha pa despues di 4 aña òf hasta promé presentá na pueblo resultadonan konkreto di un maneho riba e kuater arianan ku e propósito pa baha e gastunan aki i tene nan bou di kòntròl. Nos por, basta nos ke.

Salí for di UNION SINDIKAL BONERIANO, no por ta otro ku mi lo duna tur loke mi tin i konvensé mi koleganan polítiko pa ban duna kontenido na e lema di e manife­sta­shon di 5 di mei 2022, esta DIFERENSIA SI, PERO DESKRIMINASHON NO. Boneiru den esaki polítikamente mester papia ku un bos i un mensahe direkshon di Den Haag. Nos energia lo ta pa korigí loke ta inhustu i diskriminatorio kontra nos hendenan i no bringa pa mustra ken a faya. Nos lo boga den esaki pa e posishon aki keda kargá pa tur gremio den nos komunidat i asina Boneiru kompletu papia ku un bos i un mensahe. Lo mi pusha pa bin un konferensia di mesa rondó lokalmente pa asina analisá nos relashon ku Ulanda i den Reino, pero tambe eksplorá nos posibilidatnan den regio i otro partinan di mundu, entre kual Union Oropeo, pero tambe Venezuela, Colombia i Estádos Unídos. Nos ta parti di e region i nos por nifiká algu pa otro na bienestar di nos komunidatnan. Pa chikí ku nos por ta, stratégikamente nos ta bon situá entre Amérika i Oropa i nos lo mester bai hasi mas uso di esaki.

Tambe nos lo bai analisá e responsabilidatnan ku Boneiru mes tin riba nivel laboral i nos lo bai na pèrkurá pa no tin abuso ni eksplotashon di e ser humano na boka di trabou, kaminda nos lo bai duna sindikalismo un lugá importante den nos maneho sosial/laboral. Nos lo traha estrechamente ku e ministerio di asuntunan laboral i sosial pa krea un maneho koherente. Introdukshon di un Penshun General lo ta haltu riba nos agènda. Lo nos promové pa bin ku CAO-nan sektorial, miéntras ku nos lo stimulá pa krea un instituto di formashon pa ku funshonnan den nos industria mas importante te awor kual ta turismo. Pa loke ta “uitzendbureaunan” nos lo bai hiba un maneho severo pa nan kumpli kabalmente ku nos leinan vigente.

Tur loke nos a trese aki ta realisabel i ta realístiko pa ehekutá. Pero pa logr’é nos mester di sosten, apoyo i konfiansa di pueblo en general i di e klase trahadó i su famia en partikular. Nos lema di M21 ta NOS KE NOS POR i ta esei ta e diferensia ku nos kier trese den e ambiente polítiko/gubernamental na Boneiru. E bientu fresku mester supla. E diferensia.


Bernard Landwier.


40 views0 comments

Comentários


bottom of page