Kralendijk 30 di yanüari 2023 - Kerido pueblo votadó. Awe ofisialmente M21 ta entregá su lista ku su tim di kandidatonan ku durante e kampaña aki lo pasa den bo bario pa sera konosí ku nan personalmente pero tambe pa entregá na kada kas e prinsipionan ku M21 ta para pe.
Durante e 4 añanan ku mi a sirbi den Konseho Insular komo representante di henter pueblo, semper mi a sostené e maneho sosial ku eks-kolega Nina den Heyer a hiba, no solamente den e sala di Konseho Insular, pero tambe den mi kontaktonan ku agrupashonnan sosial na Boneiru i ku esnan na Hulanda, spesialmente miembronan di Eerste i Tweede Kamer. Esaki mi a hasié ku e konvikshon ku e nivel di bida di tur boneriano tabata i te ainda ta leu for di loke e mester ta. Nina a bandoná polítika den un forma ku a desapuntá sigur su fiel siguidónan. Na e otro un banda nos mester respetá desishon di kada ken i den esei mi ta deseá Nina tur klase di éksito den su karera nobo i ku den e funshon nobo, mi ta sigur ku e lo por logra su metanan ku ela pone su dilanti.
Sinembargo a keda atras mil i piku votadó ku a sostené, sigur den e último elekshon kaminda ela bira e hende muhé ku den nos historia polítiko a kue mas tantu voto tras di su nòmber. Ta na e grupo akí mi ta dirigí mi mes awe. Miéntras ku ami a sostené Nina, den su propio seno tabatin forsanan ku a oponé su maneho, no a respetá e kantidat di voto ku tabata sosten’é i hasta den oposishon na vários okashon a presentá moshon di deskonfiansa kontra di Nina, indikando asina ku nan no ta sostené su maneho. M21 i sigur mi perso na sin ningun duda lo ke kontinuá i terminá e trabou ku Nina a hasi. Konkretamente esaki ta enserá ku lo nos hasi tur esfuerso, usa tur nos kontaktonan pa riba e tereno sosial logra lo siguiente.
Un mínimo sosial real, basá riba e gastunan real i básiko di tur luna ku kualke kas tin. Nos punto di salida lo ta e sifranan di Regioplan, adaptá na kosto di bida for di 2018 di akuerdo ku e sifranan índise di Búro Sentral di Statistik. Esaki ta indiká ku e mínimo sosial lo mester ta alrededor di Usd. 1600.00 pa luna.
Na momento ku stipulá ofisialmente e mínimo sosial, mesora su tras mester oumentá e suèldu mínimo. Aki atrobe e indikashon ta ku esaki lo mester bira entre Usd. 1900 pa Usd.2000 pa luna.
Lo mester terminá ku introdukshon di e fondo pa desempleo.
Lo sigui primi pa e akohida di mucha bira parti integral di e siklo di enseñansa i komo tal e mester ta pòrnada. Den esaki lo nos por traha estrechamente ku Ministerio di Enseñansa, Siensia i Kultura, kaminda Nina aktualmente ta direktor pa islanan BES, i sinkronisá kuné pa alkansá e meta aki.
Basá riba e prinsipio di trato igual, mester analisá tur e kompensashonnan ku na Hulanda ta eksistí, pa wak kon nan por ta aplikabel serka nos tambe.
Hür di kas, tantu kasnan di Fundashon Cas Boneriano komo den sektor privá lo keda evaluá pa asina atendé ku esaki den un forma hustu.
Nos lo ke amplia e trabou sosial akí ku puntonan di M21 mes ku ta entre otro:
Sistema di penshun general personal.
CAO sektoral.
Barionan mas sigur, limpi, aksesibel i dushi pa biba ku infrastruktura mas bèrdè i ku posibilidat pa rekreashon.
10. Atendé ku gastunan di bibienda, komestibel, transporte, akohida i kosto di bida en general.
Nos ta konvensí ku akí ta trata di puntonan konkreto ku nos por realisá den e próksimo periodo di gobernashon. Pa alkansá e metanan aki, nos di M21 mester tin un bos fuerte den Konseho Insular i den gobernashon di nos isla. Ku e bos fuerte aki nos lo por enfrentá Hulanda i konvensé polítika di Den Haag ku boluntat di pueblo boneriano riba e tereno aki ta rasonabel i ku mester ehekut’é. Pa tal rason un apelashon riba pueblo henter, pero mui en espesial riba e mil i piku siguidónan di Nina, pa duna nos un sosten konvinsente pa e trabou di Nina por kontinuá i keda finalisá. Pueblo boneriano meresé sin mas un kalidat di bida desente i digno komo parti di Hulanda, e pais number 5 mas riku na mundu. Ta aki bo a les’é, ta aki bo a skuch’é i ta aki tin e kapasidat, e boluntat i determinashon pa kontinu’é i finalis’é. Nos ke, nos por. M21 E DIFERENSHA.