DISKURSO DIA DI BONEIRU 2025Daisy Coffie, Miembro Konseho Insular BonaireFrakshon M21

Felis Dia di Bonaire!

“Nos ta Boneiru.”

Tres palabra ku ta parse simpel, pero nan ta enserá tur identidat, orguyo i speransa di e lugá bunita akí ku nos ta stima asina tantu. Awe nos ta selebrá Dia di Boneiru, i esaki no ta solamente un fecha riba kalènder: e ta un rekordatorio di ken nos ta komo pueblo, kiko nos ta representá i kiko nos ke konstruí pa futuro.

Nos ta Boneiru, ora nos ta wak nos historia ku respét, ora nos ta honra esfuerso di hopi generashon ku a i ta yuda mantené nos kultura bibu, i tambe nos idioma i nos tradishonnan ku ta hasi nos

úniko. Nos ta Boneiru, ora nos ta komprondé ku kada persona — sin importá su edat, su orígen òf su kondishon — tin un lugá den nos komunidat.

Boneiru ta manera un faro meimei den Karibe: fuerte, firme i resistente. E faro ta bria debí na su hendenan. Debí na kada un di boso. Debí na kada mama i tata ku ta eduká ku amor; na kada trahadó ku ta hasi esfuerso pa saka su famia dilanti; na kada boluntario ku ta duna su tempu pa sirbi nos komunidat. E lus akí nunka ta paga, e lus akí ku ta guia tin un nòmber: Boneiru.I si e faro akí ta iluminá nos kaminda, ta nos hóbennan ta esunnan responsabel pa mantené e lus akí bibu. Nan ta e forsa di awe i e speransa di mañan. Den nan kreatividat ta bati inovashon, den nan energia ta palpitá kambio i den nan soñonan ta biba Boneiru su futuro. Laga nos duna nan oportunidat, laga nos tene fe den nan talento i laga nos ban kana banda di nan. Pasobra ora lus di nos hóbennan ta ekspandé, henter nos isla ta bria.

Nos ta Boneiru, ora nos ta defendé nos diversidat manera un rikesa. Ora nos ta selebrá ku na nos isla tin lugá pa diferente bos, diferente kultura i diferente manera di wak mundu, tur bou di e

mesun espíritu: amor pa Boneiru. Nos ta Boneiru, ora nos ta kuida nos tera, nos laman, nos playanan, nos naturalesa i nos bestianan, sabiendo ku e medio ambiente akí no ta solamente pa nos, sino tambe un herensia pa e generashonnan ku ta bini.

Awe no ta solamente un dia di selebrashon, pero tambe un dia pa asumí un kompromiso. E kompromiso pa traha huntu pa un isla mas úniko, mas hustu, mas habrí pa oportunidat. E kompromiso ku ningun hende no por keda atras. E kompromiso ku kada persona, kada famia, kada hóben i kada hende grandi por sinti orguyo pa bisa na bos haltu: mi ta Boneiru, nos ta Boneiru.

Kerido komunidat boneriano: E dia di selebrashon akí mester kompañá nos semper manera un guia. Manera e faro ku ta rekordá nos ku aunke tormenta ta bini, nos lus lo sigui bria. Pasobra Boneiru no ta stòp. Boneiru no ta rindi. Boneiru semper ta keda lantá.

Manera Nelson Mandela a bisa: “E deber mas noble di un pueblo ta defendé su identidat, su herensia i su libertat.” Laga e palabranan akí inspirá nos i asina balorá semper loke ta di nos.Hisa nos kara, habri nos kurason i ban kana e kaminda huntu pa logra e futuro ku tur hende na Boneiru meresé. I nunka lubidá di bisa ku orguyo, ku alegria i ku speransa:

Nos ta Boneiru!

Biba Bonaire!

Dios bendishoná Bonaire!