top of page

Segun Alberseeto Cecilia; MESTER DUNA ATENSHON NA OTRO TIPO DI DEPORTE TAMBE

Kralendijk, 4 di yanüari 2023 - Pa hopi aña kaba nos ta mira ku e deportenan tradishonal i popular, por ehèmpel futbòl, sòftbòl i beisbòl ta haña mas atenshon ku e sobrá deportenan. Esaki tin komo konsekuensia ku ta fòrsa e deportista pa skohe un deporte ku kisas no ta esun ku di bèrdat e ke praktiká. Esaki ta pa motibu ku no ta tur deporte tin fasilidat i oportunidat optimal pa por praktiká esakinan.


No ta un sekreto ku na Boneiru nos tin hopi talento. Pa nos keda na deporte so un ratu, Boneiru a destaká den deporte, manera futbòl, fòlibòl, sòftbòl, beisbòl, tènis, yudo, karate i wentsùrf. Pero nos mester konstatá ku nos no ta krea kondishon pa sigui desaroyá e talentonan aki.


Nos por mira diferente vèlt di futbòl, sòftbòl i beisbòl nèchi drechá ku yerba artifisial. Lamentablemente nos no por bisa ku esaki ta konta pa e otro deportenan. Mester wak pa e deportenan manera tènis, bichtènis, pinpòn, basketbòl, wentsùrf, waterpolo, landamentu, fristail, dreft etc., haña mesun atenshon ku esunnan tradishonal i popular ta haña. Esaki ta enserá ku mester tin fasilidat optimal manera pista, vèlt i material pero tambe treiner pagá si ta nesesario pa por praktiká e deportenan akí.


Aparte di krea fasilidat optimal mester tin maneho pa mantené esakinan riba un nivel akseptabel. Asina akí ta krea oportunidat ku for di edat yòn por praktiká diferente deporte. Esaki ta duna espasio na kada deportista pa skohe e deporte ku nan gusta i tambe ta bon den dje. Pero tambe esaki ta krea e plataforma pa praktiká deporte riba nivel, ku e fasilidatnan nesesario pa sobresalí den e diferente deportenan akí.


Tambe mester krea fasilidat pa sostené nos talentonan ku haña un chèns pa bira profeshonal. Dependiente di e situashon mester por spònser nan òf duna nan un beka pa nan por sigui desaroyá den eksterior te ora nan bira profeshonal. Si hasi esaki sin duda nos lo mira ku den futuro nos lo tin diferente deportista ta saka kara di nos dushi isla riba nivel internashonal. Un isla chikitu ku hopi talento ku meresé mas atenshon.

Esaki ta E diferensia

1 view0 comments

Comments


bottom of page