Disertashon Daisy Coffie - Apertura Ofisial di Aña Parlamentario 2026–2027

DISERTASHON DI DAISY COFFIE

Lider Politiko di Movementu 21 (M21)

Miembro di Konseho Insular di Boneiru

Apertura Ofisial di Aña Parlamentario 2026–2027

5 di september 2026, Passangrahan, Boneiru.

Señor Presidente,

Miembronan di Konseho Insular,

Invitadonan,

Dama- i kabayeronan,

Pueblo di Boneiru,

Ta ku un profundo sentido di responsabilidat, humildat y speransa mi ta para aki awe, na e momento ku nos ta habri un aña parlamentario nobo ofisialmente.

E apertura di un aña parlamentario nobo ta mas ku un seremonia.

Ta un momentu pa nos para ketu un ratu pa reflekshoná i -mas importante aún- pa nos rekordá nos mes pakiko a elegí nos.

No a elegí nos solamente pa okupa un asiento den e sala aki: a elegí nos pa representá e pueblo di Boneiru.

E Pueblo su speransanan.

Su prekupashonnan.

Su aspirashonnan.

Su frustrashonnan.

I su soñonan pa un mihó futuro.

Tur mandato ku nos a risibí ta trese un mensahe simpel, pero profundo, di nos pueblo: “No lubidá riba nos.”

E mensahe aki mester keda sentral i na kurason di tur loke nos ta hasi.

Komo representantenan di pueblo, nos tin un responsabilidat demokrátiko i konstitushonal pa kontrolá gobernashon, pa debatí habrí, pa hasi pregunta i pa tene e gobiernu responsabel pa su desishonnan.

Pero responsabilidat no ta nifiká opstrukshon.

I diferensia polítiko no mester bira hostilidat personal.

Demokrasia no ta eksigí ku nos mester ta di akuerdo ku otro.

Demokrasia ta eksigí ku nos mester respetá e derecho pa no ta di akuerdo.

E ta eksigí ku nos ta skucha.

E ta eksigí ku nos ta debatí ku echo en bes di miedu, ku argumento en bes di akusashon, i ku e interes di Boneiru semper riba nos propio ambishon polítiko.

Esei ta e standart ku mi ta konvensí ku nos mester pone pa nos mes semper.

Nos mester rekuperá konfiansa. Nos komunidat ta wak nos.

I nos mester ta honesto sufisiente pa rekonosé ku konfiansa di pueblo den polítika i gobiernu no ta algu ku nos por tuma komo garantisá.

Ta gana konfiansa ku akshon.

Ta gana konfiansa ora promesanan ta siguí pa resultado.

Ta gana konfiansa ora institutonan di gobiernu ta transparente.

Ta gana konfiansa ora representantenan elegí ta asumí responsabilidat.

Ta gana konfiansa ora siudadanonan por hasi pregunta i risibí respuesta honesto.

I ta gana konfiansa ora pueblo ta mira ku lidernan polítiko por pone interes públiko dilanti di benefisio polítiko.

Pa M21, esaki no ta solamente un slogan polítiko. E ta un prinsipio pa nos.

Nos ta kere ku bon gobernashon mester ta fundá riba integridat, transparensia, responsabilidat, partisipashon, igualdat i respet pa estado di derecho.

Esakinan no ta luho; esakinan ta e fundeshi di un demokrasia salú.

Kon e  Boneiru ku nos ke mester ta?

Ora nos ta papia di futuro di Boneiru, nos mester rekordá ku sifranan ekonómiko i reportenan di gobiernu so no ta e historia kompletu.

E midí real di progreso ta loke hende ta eksperensiá den nan bida diario.

Nos hóbennan por mira un futuro aki?

Nos famianan por permití nan  mes un kas digno?

Nos mayornan por biba ku dignidat?

Nos empresarionan por krea negoshi eksitoso?

Nos trahadónan ta gana sufisiente pa kuidá nan famia?

Nos muchanan ta risibí e kalidat di edukashon ku nan meresé?

Nos sistema di kuido di salú por respondé na nesesidatnan di nos hendenan?

Nos ta protehá e medio ambiente ku ta sostené nos isla?

I talves mas importante: Nos Pueblo ta sinti ku nan representantenan ta mira nan, ta skucha nan i ta traha pa nan?

Esakinan ta e preguntanan ku mester guia nos trabou.

Algun palabra dirigí spesialmente na e hóbennan di Boneiru:

Boso no ta solamente e futuro di nos isla.

Boso ta e presente di e isla.

Boso ideanan, kreatividat, edukashon, talentonan i boso energia ta kontribuí kaba na Boneiru.

Nos mester krea oportunidatnan pa boso por traha un bida aki, si esei ta boso eskoho.

Esaki ta nifiká invertí den edukashon.

Ta nifiká krea trabou ku futuro.

Ta nifiká sostené entrepreneurship i inovashon.

Ta nifiká hasi bibienda aksesibel.

I ta nifiká duna hóbennan un bos real den desishonnan ku lo determiná nan futuro.

Un Boneiru kaminda nos hóbennan ta obligá pa bai pa motibu ku nan no por haña oportunidat aki no ta e Boneiru ku nos mester aseptá.

Nos mester traha un isla kaminda bai ta un eskoho, no un nesesidat.

Nos mester protehá loke ta hasi Boneiru úniko i semper tene na kuenta ku desaroyo no mester yega a kosto di e kosnan ku ta hasi Boneiru spesial.

Nos naturalesa ta nos patrimonio.

Nos laman, nos rifnan, nos paisahenan, nos kultura, nos idioma, nos tradishonnan i nos identidat ta parti di ken nos ta.

Nos tin un responsabilidat pa protehá nan, no solamente pa nos mes, sino tambe pa e generashonnan ku ainda no a nase.

Desaroyo y protekshon no mester ta enemigu di otro.

Nos por fortalesé nos ekonomia mientras nos ta protehá nos medio ambiente.

Nos por risibí bishitantenan mientras nos ta sigurá ku turismo ta benefisiá nos hendenan.

Nos por modernisá mientras nos ta konservá nos identidat.

I nos por sigui dilanti sin lubidá di unda nos ta bini.

Señor Presidente,

Konseho Insular ta e instituto demokrátiko mas importante di nos isla.

Nos ròl no ta solamente seremonial.

Nos tarea no ta pa simplemente aprobá loke ta pone dilanti di nos.

Nos tarea ta representá pueblo y ehersé supervishon.

Esaki ta nifiká ku nos mester hasi pregunta—asta ora e preguntanan ta inkómodo.

Nos mester eksigí informashon—tambe ora e informashon ta difísil pa haña.

Nos mester kuestioná desishonnan ora nos ta kere ku nan no ta den interes di pueblo.

I ora gobiernu hasi algu bon, nos mester tin e kurashi pa rekonosé esei.

Esaki ta oposishon responsabel.

Esaki ta gobernashon responsabel.

I esaki ta kon demokrasia mester funshoná.

Sr. Presidente, na komienso di e aña parlamentario nobo aki, mi ta re-afirmá ku Boneiru mester di un kultura politiko nobo.

Un kultura kaminda diferensia di opinion no ta bira outomátikamente konflikto.

Un kultura kaminda no ta mira krítika komo traishon.

Un kultura kaminda koperashon no ta debilidat.

Un kultura kaminda lidernan polítiko ta komprondé ku nos ta solamente guardianan temporal di un puesto públiko.

E puestonan ku nos ta okupá awe lo pasa un dia pa otro hende.

Pero e desishonnan ku nos ta tuma awe lo tin impakto riba Boneiru pa añanan despues ku nos a laga e sala aki.

Esei mester hasi nos humilde.

Esei mester hasi nos kuidadoso.

I esei mester hasi nos ambisioso; no pa nos mes, sino pa Boneiru.

Un kompromiso di M21:

Na nòmber di Movementu 21, mi ta hasi nos kompromiso kla:

Nos lo sigui ta konstruktivo.

Nos lo sigui hasi pregunta.

Nos lo sigui lucha pa halsa e standart di integridat, transparensia i responsabilidat.

Nos lo sigui defendé e interesnan di e Pueblo en general  i e hendenan ku a konfia nos ku nan voto en partikular.

I nos lo sigui traha pa un Boneiru kaminda tur hende tin e oportunidat pa biba ku dignidat, siguridat y speransa.

Nos lo no ta di akuerdo ora ta nesesario.

Nos lo koperá ora ta posibel.

Pero nos lo semper pone Boneiru promé.

I mirando padilanti dama- i kabayeronan;

E aña parlamentario nobo ta kuminsá na un momento kaminda nos isla ta enfrentá desishonnan importante.

Nos no por resolvé tur problema den un aña.

Pero nos por skohe e direkshon kaminda nos ke bai si.

Nos por skohe pa un gobiernu responsabel.

Nos por skohe pa transparensia.

Nos por skohe pa diálogo.

Nos por skohe pa integridat.

Nos por skohe pa oportunidat pa nos hóbennan.

Nos por skohe pa protekshon di nos medio ambiente.

Nos por skohe pa rèspèt pa nos institutonan demokrátiko.

I riba tur kos, nos por skohe pa rekonstruí y fortalesé e konfiansa entre pueblo i su gobiernu.

E konfiansa ei ta presioso.

Laga nos no tuma esaki komo algu garantisá.

Laga nos gana e konfiansa ei, tur dia di nobo.

Señor Presidente,

Na mi koleganan den Konseho Insular mi ta bisa lo siguiente:

Laga nos drenta e aña parlamentario nobo aki ku kurashi.

Laga nos debatí ku forsa, pero ku rèspèt.

Laga nos tene otro responsabel, pero tambe laga nos tene nos mes responsabel.

Laga nos rekordá ku poder polítiko no ta propiedat personal; ta un responsabilidat ku pueblo a konfia nos kuné.

I ku pueblo di Boneiru mi ta kompartí lo siguiente:

Nos ta tende boso.

Nos ta mira boso.

I nos lo sigui traha pa boso.

Nos isla meresé un gobiernu ku ta sirbi su pueblo.

Nos isla meresé un Konseho Insular ku ta protehá nos demokrasia.

Nos isla meresé lidernan ku ta komprondé ku e privilegio di un puesto públiko ta bin ku un obligashon pa sirbi.

Nos ta ban hasi e aña parlamentario nobo aki un aña di responsabilidat.

Un aña di konfiansa renobá.

Un aña di koperashon unda koperashon ta posibel.

Un aña di kurashi unda kurashi ta nesesario.

I riba tur kos, un aña kaminda nos ta pone e interesnan di Boneiru i su pueblo dilanti di nos mes.

Boneiru no meresé nada ménos.

Dios bendishoná nos isla.

Dios bendishoná nos pueblo.

I Dios guia nos den e trabou importante ku ta dilanti di nos.

Sr. Presidente.