Diskurso Dia di Boneiru 2026, Seremonia Ofisial - Konseho Insular di Boneiru

Diskurso ofisial — Dia di Boneiru 2026

Daisy Coffie, Lider Politiko di Movementu 21 (M21)

Seremonia Ofisial — Konseho Insular di Boneiru

6 di september 2026

Señor Presidente di Parlamento,


Miembronan di  Konseho Insular,

Invitadonan distinguí,


Siudadanonan di Boneiru,


Dama- i kabayeronan,

Awe, 6 di september, nos ta reuní aki pa konmemora Dia di Boneiru — un dia ku ta invitá nos no solamente pa rekordá di unda nos ta bini, pero tambe pa reflekshoná riba ken nos ta i, mas importante ainda, ki sorto di Boneiru nos ke konstrui huntu.

Boneiru ta mas ku un isla bunita rodeá pa un laman magnifiko.

Boneiru ta nos kas.

Ta nos historia, nos kultura, nos idioma, nos tradishonnan, nos famia y nos komunidatnan. Ta e tera kaminda generashonnan promé ku nos a traha, a lucha, a selebrá, a kria nan yunan i a soña ku un mihó futuro.

Y ta nos responsabilidad pa sigurá ku e soñonan ei no ta terminá ku nos.

Boneiru meresé un futuro kaminda kada siudadano por biba ku dignidat, oportunidat y speransa.

E futuro ei no ta bin outomatikamente. E ta rekerí liderato. E ta rekerí kurashi. I, riba tur kos, e ta rekerí pa nos pone e interesnan di Boneiru i su pueblo riba promé luga, mas haltu ku nos diferensianan politiko.

Komo lider polítiko di Movementu 21, mi ta kere ku polítika mester bai bèk na ta un servisio.

Servisio pa e pueblo.

Servisio pa nos hendenan.

Servisio pa e generashonnan ku ta bini despues di nos.

Nos diferensianan den vishon polítiko ta legitimá. Demokrashia ta dependé di debate, di desakuerdo i di diferente perspektivanan.

Pero desakuerdo no mester bira divishon.

I kompetensia polítiko no mester hasi nos lubidá ku na final di dia, nos tur ta karga e mesun responsabilidat pa e isla aki.

Awe, mi ke papia tokante tres kos: dignidat, oportunidat y responsabilidat.

Dignidat

Tur hende na Boneiru meresé pa biba ku dignidat.

Esaki ta nifiká ku e hende ku ta traha su salario mester por yega pa e atende tur su asuntunan sin ningun strès.

Ta nifiká ku nos mayornan no mester skohe entre kuminda, remedi i paga nan fakturanan.

Ta nifiká ku nos hóbennan mester por traha nan futuro aki, sin sinti ku nan úniko opshon ta pa bandoná nos isla.

Ta nifiká ku bibienda mester ta alkansabel, ku kuido di salú mester ta aksesibel i ku ningun hende no mester sinti ku gobierno a lubid’é.

Progreso ekonomiko ta importante, pero sifranan ekonomiko so no ta bisa nos si nos sosiedat, nos komunidat, nos hendenan ta progresando.

E pregunta real ta:

Nos pueblo ta mihó awe ku ayera?

Si nos ekonomia ta krese mientras famianan ta lucha pa sobreviví, nos mester puntra nos mes si nos ta bayendo den e bon direkshon.

Si invershon ta yega, pero nos mes hendenan no por partisipá den e oportunidatnan ku nan ta trese, nos mester bininku  kambio i hasi mihó.

Si desaroyo ta kambia e kara di nos isla, pero laga nos hendenan atras, e desaroyo ei no ta kompleto.

Desaroyo mester sirbi e pueblo, e hendenan di Boneiru.

Oportunidat

Nos muchanan y nos hóbennan no ta solamente e futuro di Boneiru.

Nan tá Boneiru awe.

Nos tin un deber pa duna nan un edukashon ku ta prepará nan pa e mundu, mientras nan ta keda profundamente konektá ku nan identidat.

Nos mester krea oportunidat pa emprendementu, pa enseñansa profeshonal, pa edukashon haltu, pa inovashon i pa trabou ku ta duna hende perspektiva.

Nos hóbennan mester por bisa:

“Mi por traha mi futuro aki.”

No pasobra nan ta obligá pa keda, pero pasobra nan ta skohe pa Boneiru.

Esaki ta rekerí invershon den konosementu, kapasidat- i empresanan lokal.

E ta rekerí un ekonomia kaminda empresarionan lokal tin un oportunidat real pa kompetí.

I e ta rekerí ku nos mester  rekonosé ku nos rekurso mas grandi no ta bou di tera ni leu for di nos kosta:

Nos rekurso mas grandi ta nos hende.

Responsabilidat

Finalmente, Dia di Boneiru ta rekordá nos riba responsabilidat.

Nos a heredá un isla ku tin un naturalesa ekstraordinario i un identidat kultural úniko.

Nos ta solamente guardian temporal di tur esaki.

Nos rifnan, nos laman, nos naturalesa y nos paisahe no por papia pa nan mes. Nos mester papia pa nan atraves di e desishonnan ku nos ta tuma awe.

Desaroyo ekonomiko i protekshon di medio ambiente no mester ta enemigu di otro.

Nos mester di un ekonomia ku ta krea prosperidat mientras e ta protehá e mesun medio ambiente ku ta forma parti di nos identidat y di nos futuro.

I nos mester di un gobierno ku ta íntegro, transparente, responsabel i serka di e pueblo.

Siudadanonan no mester lucha sin fin pa skucha nan.

Gobierno mester skucha.

Gobierno mester splika.

Gobierno mester ta responsabel.

I ora gobierno faya, gobierno mester tin e kurashi pa rekonosé esaki y koregí su erornan.

Esaki no ta debilidat. Esaki ta liderato responsabel.

Siudadanonan,

Boneiru ta parti di Reino Hulandes, i nos realidat konstitushonal ta trese tantu derechonan komo responsabilidadnan.

Nos mester sigui eksigí pa trata Pueblo di Boneiru ku hustisia i igualdat i ku ta komprondé, respetá y tumá na konsiderashon nos sirkunstansianan úniko,.

Pero na mes momentu, nos mester rekonosé nos propio responsabilidat.

Nos no por warda riba un otro pa resolvé tur nos problemanan.

Nos mester fortalesé nos institutonan.

Nos mester invertí den nos hendenan.

Nos mester tene nos lidernan responsabel.

I nos mester kere den nos propio kapasidat i abilidat pa forma nos futuro.

Boneiru mester tin un bos fuerte den tur sala kaminda ta tuma desishonnan tokante Boneiru.

Pero tin un bos fuerte tambe ta nifiká sa kiko nos ta defendé.

Nos ta defendé dignidat.

Nos ta defendé oportunidat.

Nos ta defendé bon gobernashon.

Nos ta defendé hustisia sosial.

Nos ta defendé nos naturalesa.

I nos ta defendé un Boneiru kaminda nos identidat no ta algu ku nos ta preservá solamente durante seremonianan, pero algu ku nos ta biba kada dia.

Dama- i kabayeronan,

Awe, Dia di Boneiru, nos ta selebrá pasado.

Pero nos no por biba den pasado.

Nos mester honra esnan ku a bini promé ku nos dor di traha i hasi algu ku ta digno di e sakrifisionan ku nan a hasi.

Laga nos hasi 6 di september mas ku un dia di konmemorashon.

Laga e bira un dia di kompromiso.

Un kompromiso ku nos muchanan.

Un kompromiso ku nos grandinan.

Un kompromiso ku nos hendenan.

Un kompromiso ku nos kultura.

Un kompromiso ku nos demokrasia.

I un kompromiso ku Boneiru.

Laga nos no ta di akuerdo ku rèspèt.

Laga nos liderá ku kurashi.

Laga nos goberná ku integridat.

Y laga nos nunka lubidá e bèrdat simpel ku, apesar di nos diferensianan polítiko, nos ta kompartí e mesun isla, e mesun presente i e mesun futuro.

Di e generashonnan ku a bini promé ku nos, nos a risibí Boneiru.

Di nos, e siguiente generashon mester risibí un Boneiru ku ta mas fuerte, mas hustu, mas próspero i ku mas konfiansa den su mes.

Esaki ta e Boneiru pa kua nos mester traha.

Esaki ta e responsabilidat ku nos ta kompartí.

Y esaki ta e promesa ku nos mester hasi awe.

Biba Boneiru!
Biba nos pueblo!
Biba e spiritu di nos isla!

Felis Dia di Boneiru.


Pabien, Boneiru.